Nome:  Standard
Tipo: Carboeiro
Nacionalidade: Noruega
Data: 11/02/1897
Lugar: Illas Lobeiras (Arou)   

—AUDIORELATO: CADERNO DE BITÁCORA–

 

Este vapor carboeiro partira o 4 de febreiro do porto galo de Havre rumbo a Huelva con bocois e pipas baleiros. O seu capitán, Hans C. Andersen, foi relevado na garda da ponte ás catro da madrugada do 11 de febreiro polo primeiro oficial do buque noruego. A noite escurecía un mar infernal que o barco capeaba como podía.Media hora despois do relevo de garda, o Standard colisionou violentamente co Baixo do Negro. A duras penas efectuaron o abandono do barco no primeiro bote salvavidas 11 tripulantes xunto ó seu capitán e facéndoo nun segundo, o fogueiro, o cociñeiro e dous mariñeiros.

A mala sorte fixo que a segunda das embarcacións fora levada ó fondo do mar por unha gran onda e desapareceran tres dos seus tripulantes, salvándose milagrosamente Johan Sodinbirg polos brazos dos compañeiros do primeiro bote.

O destino permitiulles pisar  a area da praia das Lobeiras, sorteando incriblemente toda unha morea de cabezos e rompentes a flor de auga, chegando con vida os trece compoñentes da embarcación auxiliar. Ó rachar o día do 11 foron testemuñas dun segundo afundimento, o do  Daylight.

A poboación de Arou rebuscou nos baúis na procura de prendas para abrigar ós náufragos.Coas poucas das que dispoñían xa vestiran ós superviventes do City of Agra.